Самы вядомы беларускі дылетант адправіўся за мяжу, каб расказаць пра Францыска Скарыну.
Вядомы аматар падарожжаў па Беларусі Юрый Жыгамонт зрабіў спецыяльны выпуск праграмы «Падарожжа дылетанта», прысвечаны 500-годдзю беларускага кнігадрукавання. Дзеянне адбываецца ў Празе, дзе ў 1517 годзе выдаў першую кнігу на беларускай мове славуты Францыск Скарына. З гэтага выпуска пачынаецца новая старонка ў гісторыі знакамітай перадачы: цяпер «Падарожжа дылетанта» ствараецца пры падтрымцы velcom і будзе выходзіць два разы на месяц.
«Падарожжа дылетанта» упершыню накіравалася за межы Беларусі, каб распавесці пра тыя мясціны, дзе калісьці жыў і працаваў беларускі першадрукар Францыск Скарына. У праграме паказаны той самы будынак, дзе, па меркаваннях навукоўцаў, выйшла у свет першая друкаваная кніга на беларускай мове, а таксама шмат іншых месцаў, звязаных з вядомым асветнікам і гуманістам. У гэтым выпуску вядучы Юрый Жыгамонт таксама звярнуў увагу на тое, як цесна пераплецены гісторыі Чэхіі і Беларусі.
««Падарожжа дылетанта» існуе ўжо большо за 15 год. За гэты час, канешне, адбылося імклівае развіццё новых тэхналогій. І мне разам з маей камандай хацелася, каб як мага больш беларусаў працягвалі глядзець перадачу і адкрывалі яе для сябе, – адзначыў Юрый Жыгамонт. – Новы фармат і рэсурс, на якім будзе выходзіць праграма, адкрывае перад ёй новыя вялікія магчамасці. Таму я вельмі ўдзячны партнерам — кампаніі velcom і парталу TUT.BY — за тое, што мы змаглі зберагчы самабытнасць «Падарожжаў дылетанта», але і разам з гэтым даць новае жыцце праграме».
Праграма «Падарожжа дылетанта» выходзіла на тэлебачанні з 2001 года. Было створана некалькі сотняў выпускаў пра мястэчкі Беларусі. У 2012 годзе аўтар і вядучы праграмы Юрый Жыгамонт быў ўзнагароджаны Міністэрствам культуры нагрудным знакам «За ўнёсак у развіццё культуры Беларусі».
««Падарожжа дылетанта» – гэта сапраўдны моцны беларускі брэнд. Дзякуючы праграме, беларусы маюць магчымасць адкрыць для сябе ўсё больш дзіўных месцаў у роднай краіне. Нашай камандзе было цікава назіраць за праектам на працягу столькіх гадоў яго існавання, і мы вельмі радыя, што цяпер можам разам развіваць яго», – распавяла галоўны рэдактар TUT.BY Марына Золатава.
Пражская серыя складаецца з двух выпускаў, першы можна ўбачыць ужо 31 студзеня, другі – праз тыдзень, 7 лютага. Пасля паездкі ў Чэхію самы знакаміты дылетант вернецца да падарожжаў па Беларусі з новымі накірункамі і цікавымі фактамі.
«500-годдзе першай беларускай друкаванай кнігі Францыска Скарыны – гэта значная дата, якая заслугоўвае вялікай увагі. – адзначыў кіраўнік аддзела карпаратыўных камунікацый velcom Вячаслаў Смірноў. – Нацыянальная гісторыя і культура – вельмі важныя каштоўнасці для нашай кампаніі. Праграма «Падарожжа дылетанта» асабіста для мяне з’яўляецца такім скарбам, які для многіх беларусаў знаёмы з дзяцінства. Аднаўленне ў сучасным лічбавым фармаце дазволіць яшчэ больш пашырыць кола яе гледачоў і прыхільнікаў».